ढुंगेलको चालचलन ठिक छ कि छैन भन्न प्रधानमन्त्री राजा होइबक्सन्न : गगन थापा


सर्वोच्च अदालतले जन्मकैद फैसला सुनाएका पूर्वसांसद बालकृष्ण ढुंगेललाई प्रधानमन्त्रीले मनोमानी रूपमा कैदमिनाहा गरिदिएको भन्दै प्रमुख प्रतीपक्षी नेपाली  कांग्रेसले आपत्ति जनाएको छ।

मंगलबारको संसद बैठकमा विषेश समय मागेर बोल्दै सांसद गगन थापाले सरकारले मनोमानी रूपमा यसरी निर्णय गर्न नपाउने बताए।

जेलमा रहँदा असल चालचलन देखाएको भनेर  सरकारले गणतन्त्र दिवसको अवसरमा मंगलबार ढुंगेलको बाँकी कैद मिनाहा गरेको थियो।

‘पूर्वसांसदलाई जन्मकैदको फैसला सुनाएपछि उहाँले अदालतले जारी गरेको वारेन्ट खारेज गर्छु, त्यो फैसल मान्दिनँ, मेराविरुद्ध फैसला गर्ने न्यायाधीशलाई म वारेण्ट जारी गर्छु भन्ने भाषण गर्नुभएको थियो,’ थापाले भने, ‘प्रधानमन्त्रीले अदालतलाई धम्की दिने ढुंगेलको चालचलन ठीक छ भनेर मनोमानी रूपमा कैद मिनाहाको निर्णय गर्नुभयो। हिजो राजाले त्यसै गर्थे अब गणतन्त्र आइसक्यो कसैको चालचलन ठिक छ कि छैन भन्न प्रधानमन्त्री राजा होइबक्सन्न।’

थापाले ढुंगेलको मुद्दा संक्रमणकालीन न्यायअन्तर्गत नपर्ने पनि बताए।

ओखलढुंगाका उज्जनकुमार श्रेष्ठको हत्यामा दोषी ठहर गर्दै सर्वोच्च अदालतले ढुंगेललाई जन्मकैदको सजाय सुनाएको थियो।

Share:

© 2017 Setopati Sanchar Pvt. Ltd.